Göreme
天光，開始經過一座座大石，大石上有一個個洞，好似屋咁樣，睇嚟已經進入咗 Cappadocia，不過仲要一段時間至到達 Göreme。Göreme 係 Cappadocia 中間一個城，比較方便安排各種 tour 同埋行山。
Göreme 好細，連個 Octogar 都細過人。清晨時間到達，人都冇個。我和 B 佢哋分開，去搵 Ahmed 推介嘅 Hostel Terra Vista。時間仲早，不過好彩 reception 有人，而且有房，50 TL 一晚，呢個時候唔使預訂就有空房，睇嚟遊客真少得好緊要。
沖完涼上天台食早餐，呢間 hostel 嘅天台風景好。坐耐咗至發覺，呢度好凍，仲好大風，個天又好多雲陰得好緊要，咖啡話咁快就凍咗。由天台望去 Göreme 和周圍山石，發覺都唔見熱氣球嘅。熱氣球要 100 EUR 我唔玩，之前玩過就唔使再玩。但照計大把人玩至啱，有啲相係成個天都係熱氣球架。
我會响度留四日，有時都唔知係咪太多，但行山應該可以用很多時間掛。呢度啲 tour 有 green tour、red tour、blue tour，其實我每日一個都可以好充實嘅。不過 hostel 人話 red tour 嘅地方我自己都可以去。
咁就行去 Open-Air Museum，主要係睇幾座保存良好嘅教堂，同埋裏面嘅璧畫，雖然我覺得都唔係保存得好好，但之後去第二度睇嘅又真係好差，所以呢個 museum 嘅已經算好好喇。係 10 至 12 世紀嘅嘢，尤其係要額外收費嘅 Dark Church (Karanlik Kilise)，細細間但裏面嘅畫保存最好。
食完晏，坐巴士去 Uçhisar，2 TL，Uçhisar，人少到似鬼城，响市中街上行走，睇見有啲 guesthouse，但關咗門。向 Uçhisar Castle 方向繼續行，見 Castle 周圍嗰啲石山，上面一個個洞，有啲似係擺賣嘅店，但全部都冇人。
有一個角度望過去，很似《Winter Sleep》中主角旅館外嘅山路，只知電影係响 Cappadocia 拍。我行過去睇下條山路係咪會通去一間房，但落到去，幾個洞嘅房都冇晒嘢，荒廢咗定係點呢？行返去 Castle 嗰邊，風大得好緊要人都吹郁，入 Castle 裏面避避。
所謂 Castle 其實又係一大座大石山，不過有好多房，長年風化侵蝕，遲早會倒閉，基本上 Cappadocia 嘅古蹟都係同一命運。可供開放嘅地方好少，只有幾間房。好彩仲可以上頂。
Uçhisar Castle 係個名勝古蹟，旅遊資料建議一早嚟避開一車車遊客。明信片仲見城堡係熱氣球嘅常用背景。而家只得我一個人。城頂望過去通往 Göreme 嘅 Pigeon Valley，諗諗點樣行至啱。
响 Cappadocia 行山，冇乜詳詳細資料，搵到嘅資料，總係話你會見到路標架喇，跟住行就得。今日下晝打算行嘅係 Pigeon Valley，或者由 Göreme 嗰邊嚟嘅路會清楚啲？唔知道，只知道我經常搵唔到所謂有清楚指示嘅「入口」。
我仲成日都揀咗唔正常嘅路嚟行，明明响上面望過去，應該係 castle 東面入比較「正路」，偏偏因為想响西面嗰啲一座座石中間行，而揀咗嗰邊，啲路都係沙石，只要斜多一啲啲，我對死人鞋就跣到七彩，今次我雖然著咗對普通運動鞋，平時行街係幾好，唔會整污漕對腳，但一去到呢啲路，都係對 crocs 勁。
周圍明明冇人，一個細路女突然彈出嚟我前面，見我不敢行啲斜路或好慢，就停落嚟，我唔知佢講乜，但跟住佢，然後去到盡頭，我行去 Valley 方向，佢我跟佢行另一便，指手劃腳，意思似乎係嗰邊行唔到，要返上車路。
仍然唔聽勸告，同細路女揮手之過繼續行過去，其實係去咗城堡後面一啲靚酒店同住屋，穿過之後就見到谷地，不過呢段路又斜又爛，行得勁慢。心諗都係呢個方向架啦，去到一個分支路口，見有指示寫住 Göreme，心諗冇死。
點知行下行下好似走咗入人哋塊田，然後路越來越難行，越來越容易跣低，去到一個地方，終於跣咗落去，仲要遇上兩隻狗，走過嚟狂叫，應該想我走，好彩即刻有人走過嚟。話呢度通唔過去 Göreme，指咗我去上面嘅路。
咁就沿住上面啲路行啦，但就越行越上，差唔多係 valley 嘅崖邊，然後行到去一個地方，冇法，好高，又斜，過唔到，以我嘅鞋一定唔得，而且今次跣落去會係好大件事嗰，終於放棄咗，一定係行錯咗路，不會咁難嘅。
但睇睇嗰張超簡單嘅地圖，又真係經過咗一個疑似 tunnel 嘅地方，有啲唔甘心，不斷去試行各條分支，因為其實真係幾多分支架，有一條係向下行嘅，是返番到谷底，應該係啱嘅，但去到係水，唔通因為儲咗水所以頭先個人話行唔通？
試過好多路之後，死死地行返上去，兜咗好多彎至行到車路，算啦，其實都睇到 Valley 嘅一啲風景。沿住條車路行下行下，突然發現有隻狗跟住。我停佢停，我行，佢又行，有時佢又走咗出馬路，搞到啲車要避佢，真係幾驚險。
行咗好耐，佢仲跟住，我停低走到崖邊，佢又走過去，搞乜呀，趕佢都冇用。行到 Göreme，我轉入去啲旺區，終於唔見咗佢。
因為胃口問題，到而家都仲係試唔得幾多土耳其食物，走去出名當地 pide 嘅店，叫咗豆湯同 pide，土耳其豆湯都好好飲，佢哋沙律同湯都附上檸檬，到今日唔知自己浪費咗幾多嘢食，一嚟就超多麵包沙律，有啲餐廳奉送沙律，我根本食唔晒，由吃少少，到索性唔食，到叫嘢食嘅時候講明唔要麵包沙律。
飲完個湯都飽咗，但係點樣都要食 pide，真係好好味，但係好大個，佢哋會將個 pide 切成一片片，但都十幾廿塊，食咗幾塊就食唔落，唯有打包。
戶外凍到癲，究竟係咪得幾度，聽日要帶埋件 fleece 至得。
Göreme
Uçhisar
Uçhisar Kale
Turkish pide