Pamukkale
買咗朝早八點半嘅車票去 Pamukkale，八點至開始有早餐食，Amed 唔知醒我走咗入佢個 dorm 叫佢，趕頭趕命，結果八點半至走人，心諗巴士唔等人，不過去到竟然又冇問題。噚日託 guesthouse 職員買票嘅時候佢話買唔到普通巴士，要坐特別車，當時冇諗咁多有得搭就得。原來好搞笑，我哋係坐人家嘅 tour 小巴，即係由呢度去 Pamukkale 的 tour，順便載我哋去，不過照收巴士錢咁解。
我跑到去巴士公司時，車仲未到，我將噚日嘅 reservation receipt 畀公司職員，順便買埋聽晚去 Göreme 嘅車飛。個職員問我之後仲去邊，我答 Urfa，他話，唔好去，危險。
我諗起 K，基本上土耳其東南面的地方，Urfa、Harran、Mardin、Diyarbakır，我都唔可以去，他甚至好認真咁同我講 promise me you will not go to Diyarbakır，我只好唔想答咁應佢 OK… 個心淨係諗行程作廢了唔知點算，都係去到 Cappadocia 至算啦，或者嗰度的人比較近東南面，會有唔同睇法呢。
因為係坐人哋 tour 車去 Pamukkale，所以會有導遊講嘢，話今日天氣好好，好好彩呀，噚日至落雨，上兩星期 Cappadocia 仲落緊雪。
好快就到咗 Pamukkale，拎住張收據去 Metro 巴士公司換真車飛，價錢變咗 55 TL，即係之前巴士公司收咗 5 TL 手續費，時間由夜晚八點變咗九點，仲要唔係响 Pamukkale 直接出發，而是由 Denizli 開出。
去到 ANZ 老闆介紹嘅 Dört Mevsim Hotel，45 TL 一單人房，Ahmed 因為今晚就要飛返去 Istanbul，暫存行李。勁肚餓，就在呢度食午餐，叫咗 kofte (肉丸/肉餅) 即整好好味，好多配菜。酒店似乎只得我哋兩個同埋同場另外兩個遊客咁。當我哋等緊嘢食嘅時候，佢哋行過嚟問可唔可以一齊食。
佢哋一個係台灣人，T，一個係加拿大籍嘅中國人，B，兩個朋友响以色列讀書。我哋就咁就一齊玩。食完成一點鐘，Ahmed 要三時半返到嚟搭車去機場，即係話只得兩個半鐘去，個入口仲要好鬼遠，我估快步行都成半粒鐘，不過又唔知點解好好彩，酒店嘅人車我哋去到入口喎。
Pamukkale，Pamuk 係綿花，kale 係城堡，有座小山上有好多 Travertine 洞石，石灰岩由泉水沉積成，一個個白色池水。記得睇過啲相真係好靚架。我哋入閘後先經過一個古城 Hierapolis，然後去到 Travertine，一睇嚇親，係有一兩個池係有水咁大把，然後就見到啲人响裏面玩水。其他嘅池，冇水，見到有啲水喉灌緊水......
而 Hierapolis 嗰邊呢，就有一個泳池，池中有好多柱，好似係古蹟，池水有啲功效，不過冇乜人落水，而且要錢，我們都唔入去。結果又係睇古城。呢個古城嘅 theatre 雖然冇 Ephesus 嘅咁大，但就完整得多，之前聽過導遊話，如果有鬥獸表演功能嘅話會有啲唔同，多咗啲阻隔安全設施，Hierapolis 嘅 theatre 應該就只係用嚟演講開會或文藝表演。
三點幾，Ahmed 同我哋道別先行。我突然都幾 enjoy 有人一齊旅行。T 同 B 同我三個响烈日下繼續，不過 Hierapolis 都冇乜好睇，終於去 Travertine 落水，原來池底好滑，唔小心就好容易滑倒，有啲地方又有好多尖碎石。
落過水就算，休息一陣行去西面，原來嗰便仲有 Travertine 架，有啲池仲係有水架，我心諗如果 Ahmed 落去時八掛下嚟呢度睇下就好喇。而呢個區嘅池係唔俾進入嘅。
然後有啲當地人問我係唔係韓國人，今次旅行俾人問得最多嘅就係唔係韓國人，其次係日本人，可能之前都幾多日韓人嚟啦。
沿住可以腳踏嘅 Travertine 嗰邊赤腳落山，離開之後食土耳其雪糕，例牌要俾人玩番陣。
同 B 佢哋分開一陣，佢哋去逛山下嘅湖，我就去附近周圍行，搵 ATM。一路逛一路覺唔妥，不妥係冇乜遊客，至醒起，之前响 Aya sofya 覺得冇傳聞咁擠迫，然後，我又醒起有次 Hammam 老闆問我哋 ANZ Guesthouse 有幾多客。Ahmed 仲話之前他嚟土耳其係超多客架。而 Pamukkale，是其中一個最多人參觀嘅地方呀。
返到酒店，心血來潮，測一下熱水，竟然真係有問題，然後酒店嘅人去咗搵人維修，話我食完嘢返嚟就會有熱水，真係好彩試一試......
响一間日本人開嘅餐廳食土耳其餐，好好味同埋好豐富，只係 15 TL。B add 我 FB 時，問點解我嘅頭像圖案，是全黑色嘅。呢個問題之後都有人問，我都唔知點樣講佢哋知好。
返到酒店，酒店嘅人話整好咗，係因為有條熱水喉爆咗，又會咁啱。
Kofta
乾晒溏…
