好早就醒，呢間 hostel 外面經常有人講嘢有啲嘈，對我嚟講最大問題係早餐時間，九點至開始…啲住客同職員原來噚晚去咗飲酒，好似未訓醒咁款。有時我都覺得自己唔識食煙飲酒冇咗好多結交機會咁。係咪應該人哋請我食煙係咁易都吸兩啖畀下面。
早餐係呢度啲人普遍會食嘅嘢，一定會有嘅係大量麵包，唔同嘅麵包醬，新鮮蕃茄青瓜，芝士以及唔同嘅橄欖。雖然簡單，但我越食越鍾意，尤其係芝士，而一向都唔食嘅橄欖，竟然接受到，之後仲要鍾意咗。
行去 Topkapı Palace 途中，見到一間 Bahaus Guesthouse，入去問問價錢，個 reception 反應呆滯，佢話因夜更冇訓，我見佢哋嘅早餐時間 7:30，同佢訂 7/5 嘅房，佢話不如我上網訂，我問我唔可以响度直接訂架咩？真奇怪，但佢好似好難為咁，結果佢响一本簿嘅 7/5 日寫低我名，一間房，我問佢要幾多錢，佢話 20 EUR，到時至收錢，心諗真係好嘞。(但之後就知衰)
Topkapı Palace 好大，淨係啲城門都又高又大又靚。個廚房好似啱啱開放，裏面搞到變咗個展覽館，展示好多器皿，地上放滿小石頭，上面舖咗木地板，响上面行嘅時候聽到石仔聲音，好得意，守衛全程睇住，唔准影相。
想參觀埋 Harem 要額外收 25 TL，Palace 本身已經收 40 TL，Museum Pass 就全包，所以真係好化算。Harem 好大，資料話有成 400 間房，安排單程路線畀遊客，裏面有啲房嘅裝飾真係好精緻，行完會直接到達 Palace 北面，嗰度有好多花，人羣聚响度影相，離開人羣行去中庭，不過仲多人，因為有間展示寶物嘅房，遊客排隊响房裏繞圏，基本上主要係睇嗰把好靚有翡翠嘅 Topkapı Dagger 同一粒好大嘅鑽石。
行完皇宮行去 Süleymaniye Mosque，由 Gülhane 站打橫行過去，竟然成條路鬼影都冇隻，兩邊嘅店都關門，明明仍然屬於旅遊區。不過好清靜舒服，又唔會俾陽光直曬。
其實行去 Süleymaniye Mosque 一心只係想食附近食店嘅豆飯，竟然冇打算過去參觀呢座清真寺，可能因為實在睇過太多，有啲厭倦。但係去到一見到，又被吸引住。寺旁嘅一排食店都有得食豆飯，好多間都係叫做乜嘢 Ali Baba 嘅，所以我都唔知我食嘅係咪就係想食嗰一間，不過是但，好好味，只係冇預過係辣辣地，有啲擔心，因為今晚要座夜巴士，N 年前响印度座夜車個肚唔舒服嘅陰影仲响度。
唔想再睇清真寺，其中一個原因係覺得麻煩同污漕。不過咁，土耳其嘅清真寺，好乾淨，冇合適衣著準備，又有得借畀你。而且 Süleymaniye Mosque 好靚，所以都係入去睇埋佢。
返去 Sultanahmet 睇 Islamic Art Museum 同 Mosaic Museum，然後就搭車去 Octogar (巴士站)，Tram 同 Metro 多人到爆，仲要好熱。六點就到咗 Octogar 站，一出閘就有一羣人問我去邊然後帶我去買車飛。去 Selçuk 嘅車開八點，响一間食店打發時間，但又唔敢亂食嘢，結果只係飲咗茶同湯。
話就話係八點，但往往都唔準時，成八點半至開車，土耳其嘅長途巴士有服務員，好似飛機咁有小食同嘢飲，其實都幾好，前面椅背有 screen 可以睇戲，不過我只想熄咗佢訓覺，唔識熄，好彩佢唔知做乜過一排自動冇咗畫面，其他位冇人用嘅 screen 又仍然開住，好詭異。
去到十點幾十一點，架巴士都未熄燈，覺得奇，然後巴士停低，前面好多車排隊等上船，之後睇地圖，都唔係好明點解要用船過海唔用橋？船程唔算長，但都落車去逛逛，風大，凍到癲，呢入船餐廳，好多人買熱飲熱食。
上岸後巴士終於熄燈，差唔多十二點，終於有得訓，不過，呢度啲巴士，總係要停好多次一啲城市嘅 octogar 去上落客，好處係唔使擔心冇得去廁所，但就搞到訓得唔係好好。
Topkapı Palace
Harem
Süleymaniye Mosque
